चांदोबा, पिझ्झा-नान आणि स्पगेटी नूडल्स

आज सकाळी शाळेत जात असताना "आम्हाला" आकाशात ‘चांदोबा’ दिसला. (कधी कधी सकाळी सुद्धा चांदोबा दिसतो बरं का, आकाशात !) आम्ही तो मम्माला दाखवला. तिने पाहिला तो आणि "ह्म्म, चांदोबा !!!" अशी आमच्या dialogue ची पुनरावृत्ती केली. 

तसंच अजून पुढे चालत असताना, रस्त्याशेजारील इमारतीतील खिडकीतून, मोठ्ठा गोलाकार पिवळ्या दिव्याचा प्रकाश दिसला. आम्ही मम्माला म्हणालो, “अजून एक चांदोबा”! :-) ती हसायला लागली.

असंच होतं आजकाल सारखं !!!! 

आम्हाला कळतंच नाही हे मोठे का हसतात आमच्या बोलण्याला ते !!!

परवा एका नवीन खाद्यपदार्थाची आमची ओळख झाली. त्रिकोणी आकाराचा तो पदार्थ पाहून आम्हांला पिझ्झा आठवला. आम्ही त्याला पिझ्झा म्हणालो. आम्हाला सांगण्यात आलं की, याला “नान” म्हणतात. आम्ही त्याचं नामकरण केलं,  पिझ्झा-नान !

सगळे हसले आमच्या त्या नावाला !!!

मग आम्ही पण हसलो आणि खाता खाता परत परत म्हणत राहिलो, “पिझ्झा-नान”!!!

मग परत आम्हांला सांगण्यात आलं , की, याला नुसतच “नान ” म्हणतात. 

🤔

काल परत तो ‘नान’  बाबा दिसला. मागच्या वेळेला तो खाऊन पाहिला होता. त्या अनुभवावरून, आम्हांला  त्याला ‘ चपाती- नान' म्हणावंसं वाटलं. मग म्हणालो आम्ही तसं.  मग सगळे परत हसले आमच्या त्या "चपाती-नान" नावाला !!!

??????

असंच काही दिवसांपूर्वी प्रथमच Noodles सारखाच दिसणारा पदार्थ खात होतो, तेव्हा झालं !

Noodles सारखाच दिसणारा तो पदार्थ, म्हणून आम्ही त्याला Noodles म्हणालो. तर आमच्या दादाने आमच्याकडून   त्याला हव्या तशा उच्चारासह "स्पगेटी" असं वदवून घेण्याचा प्रयत्न केला.

आम्हाला त्याला ‘ स्पगेट्टी नूडल्स’ म्हणावसं वाटलं. आम्ही त्याला ‘ स्पगेट्टी नूडल्स’ च म्हणत राहिलो. दादाला ते सहन होईना. मग दादा आणि आमची, स्पगेट्टी ❌स्पगेटी नूडल्स अशी जुगलबंदी काही वेळ सुरु होती. शेवटी बहुदा वैतागुन दादाने आमचा brain  aka word aka pronunciation washing चा नाद सोडला.

आमची सुटका झाली !!!

आमची स्पगेट्टी नूडल्स जिंकली !! :-)

आम्ही आपलं आमच्या अनुभवावरून “नामकरण” करतो. हे मोट्ठे त्याला हसतात, निराळीच ‘नावं’ सांगतात.

आमच्या छोट्याशा विश्वात असं काय-काय सुरु असतं सारखं....

पण आम्ही नाही घाबरणार नवीन शब्दप्रयोग करायला !!!

आम्ही करणारचं प्रयोग नवनवीन !!! 👶🕵️‍♀️

- Trupti